हिंदी चित्रपटसृष्टीच्या इतिहासात सध्या एकाच नावाची चर्चा आहे, ती म्हणजे अभिनेता रणवीर सिंग आणि त्याचा ‘धुरंधर’ चित्रपट. या स्पाय-थ्रिलर चित्रपटाने बॉक्स ऑफिसवर अक्षरशः वादळ आणले असून, आता हा चित्रपट भारतातील सर्वात जास्त कमाई करणारा हिंदी चित्रपट ठरला आहे. निर्मात्यांच्या अधिकृत माहितीनुसार, या चित्रपटाने भारतात आतापर्यंत तब्बल ८३१ कोटी रुपयांचे (नेट कलेक्शन) उत्पन्न मिळवून नवा इतिहास रचला आहे.
‘पुष्पा २’ ला टाकले मागे
बुधवारी या चित्रपटाची निर्मिती करणाऱ्या ‘जिओ स्टुडिओज’ने (Jio Studios) सोशल मीडियावर एक खास पोस्टर शेअर करून या यशाचा आनंद साजरा केला. या पोस्टरवर रणवीर सिंगचा डॅशिंग लूक दिसत असून, ‘थँक यू इंडिया. गणपती बाप्पा मोरया!’ असा संदेश लिहित निर्मात्यांनी देशातील जनतेचे आभार मानले आहेत. चित्रपट प्रदर्शित होऊन ३३ दिवस झाले असून, या कालावधीत त्याने ८३१ कोटींचा टप्पा गाठला आहे.
यापूर्वी हा विक्रम अल्लू अर्जुनच्या ‘पुष्पा २: द राइज’च्या नावावर होता. ‘पुष्पा २’ च्या हिंदी आवृत्तीने ८२१ कोटींची कमाई केली होती. दरम्यान, चित्रपट व्यापार विश्लेषकांच्या मते मंगळवारपर्यंत ‘धुरंधर’चे कलेक्शन ७८२ कोटींच्या आसपास होते, परंतु त्यानंतरच्या झेपमुळे या चित्रपटाने ‘पुष्पा २’ ला मागे टाकत अव्वल स्थान पटकावले आहे.
५०० कोटींच्या क्लबमधील इतर दिग्गज
‘धुरंधर’ने केवळ विक्रमच मोडले नाहीत, तर भारतीय सिनेसृष्टीत एकाच भाषेत सर्वाधिक कमाई करण्याचा नवा मापदंड (Benchmark) सेट केला आहे. या शर्यतीत ‘छावा’ (६०१ कोटी), शाहरुख खानचा ‘जवान’ (५८६ कोटी), ‘स्त्री २’, ‘गदर २’, ‘पठाण’, ‘ॲनिमल’ आणि ‘बाहुबली २’ यांसारख्या सुपरहिट चित्रपटांचा समावेश आहे, ज्यांनी ५०० कोटींच्या वर कमाई केली होती.
काय आहे ‘धुरंधर’ची गोष्ट?
आदित्य धर यांच्या दिग्दर्शनाखाली बनलेला ‘धुरंधर’ हा एक हाय-व्होल्टेज स्पाय थ्रिलर आहे. यामध्ये रणवीर सिंगने ‘हम्झा’ नावाच्या एका भारतीय गुप्तहेराची भूमिका साकारली आहे, जो कराचीमधील गँगस्टर आणि दहशतवादी जाळ्यांचा पर्दाफाश करण्यासाठी पाकिस्तानात घुसतो. रणवीरसोबतच या चित्रपटात अक्षय खन्ना, अर्जुन रामपाल, संजय दत्त आणि आर. माधवन यांसारख्या दिग्गज कलाकारांच्या महत्त्वाच्या भूमिका आहेत.
या चित्रपटाच्या प्रचंड यशानंतर आता चाहत्यांना प्रतीक्षा आहे ती याच्या दुसऱ्या भागाची. ‘धुरंधर भाग २’ मार्च २०२६ मध्ये प्रदर्शित होणार असल्याची चर्चा आहे.
